Hindberja- og möndluterta

Það er orðið dáldið langt síðan ég gerði þessa yndislegu köku.  Vona að ég sé að muna uppskriftina alveg rétt.  Hindber eru svokölluð ofurfæða, full af andoxunarefnum og vítamínum.  Það er um að gera að nota þau fersk þegar hægt er að fá þau falleg og fersk í búðunum.  En þau fást frosin allt árið um kring, svo það er alltaf hægt að búa sér til eitthvað gott úr þeim.

1 ½ bolli möndlur

½ bolli valhnetur

2 tsk appelsínuýði rifið

½ tsk vanilluduft

1 ½ bolli döðlur (ég mýki þær aðeins í volgu vatni)

100-150 g 70% lífrænt súkkulaði eða sykurlaust súkkulaði

Setjið möndlur og hnetur í matvinnsluvél og malið svona milli gróft. Bæta döðlum og appelsínuhýði ásamt vanilludufti eða dropum útí og blandið þar til degið klístrast vel saman. Saxið súkkulaðið smátt og hrærið útí deigið. Þrýstið niður í form og setjið inn í frysti 

Fylling:

3 dl kasjúhnetur, (best að leggja í bleyti í 2-4 klst)

1 -1½ dl agave

1½  dl kaldpressuð kókosolía

2 tsk vanilluduft

smá himalaya eða sjávarsalt

500 g frosin hindber, en taka dáldið af þeim frá til skreytingar.

Hellið vatninu af kasjúhnetunum og setjið þær í matvinnsluvélina ásamt agavesýrópi og kókosolíu og blandið vel saman, þar til þetta er orðið kremkennt.  Bætið síðan frosnu hindberjunum útí og blandið þar til þetta er orðin fín og mjúk blanda.   Setjið fyllinguna ofan á  botninn og setjið kökuna inn í kæli í 2-3 klst eða í frysti í 1 klst. 

Skreytið með fullt fullt af ferskum eða frosnum hinberjum.  Ég setti líka pínu pons af dökku súkkulaði.

 

Kjúklingur í hnetusmjörssósu

Þessi uppskrift varð til svona alveg óvart hjá mér þegar ég var að reyna að nýta afganga og búa til einhvern dýrindisrétt úr eiginlega engu.  Það tókst líka bara nokkuð vel þó ég segi sjálf frá. Upplagt er að nota allt afgangs grænmeti sem finnst á heimilinu og afgangs kjúkling.  Svo er auðvitað hægt að kaupa, bringur eða lundir eða eitthvað annað fínerí og skella í réttinn.  Uppskriftin sem hér fer á eftir sýnir það hráefni sem ég notaði í réttinn, en það er auðveldlega hægt að leika sér með það.  Gleymdi svo að taka mynd af þessu en ég reyni að bæta úr því fljótlega.

Kjúklingur, afgangar í bitum, 3-4 bringur eða annað.
Kókosolía eða ólífuolía
Brokkolí
Gulrætur
Rauðlaukur

Vatn
Kjúklingakraftur (úr heilsudeildinni auðvitað)
2 msk hnetusmjör (frá Himneskt)
salt og pipar
smá skvetta af soyjasósu eða tamarisósu.
Kasjúwhnetur svona 1 lítil lúka

Skera kjúklinginn í bita og brúna aðeins á pönnu.  Skera grænmetið og skella út á.  Krydda með salti og pipari og leyfa að malla aðeins.  Setja vatn, kraft og hnetusmjör út á pönnuna og leyfa þessu að malla vel.  Nauðsynlegt að hræra í annars lagið svo að hnetusmjörið blandist vel við. Setja smá soyjasósu eða tamarisósu út á.  Hneturnar yfir og leyfa þeim að sjóða aðeins með.  Smakka svo bara vel til og bæta við salti og hnetusmjöri eftir smekk.

Borið fram með heilhveitnúðlum eða pasta og grænmeti.

Kjúklingur í tómata- og sveppasósu

Þessi kom réttur kom verulega á óvart.  Hann er mjög einfaldur í matreiðslu en tekur samt dáldinn tíma að elda hann.

4-5 kjúklingabringur
1/2 bolli spelt
salt
pipar
paprikukrydd
ólífuolía eða kókosolía

Skera bringurnar í litla bita.  Blanda kryddinu saman við speltið og velta kjúklingnum upp úr því.  Brúna í potti í stutta stund.  Setja kjúkinginn til hliðar á fat eða disk í smá stund.

1 stór laukur
3-4 hvítlauksrif
ólífuolía eða kókosolía

Skera laukinn og hvítlaukinn og brúna í pottinum.

1 dós niðursoðnir tómatar í bitum
1 teningur kjúklinga- eða grænmetiskraftur

Setja tómatana í pottinn ásamt kraftinum.  Bæta kjúklingnum út í.  Leyfa þessu að malla í ca. 30 mínútur.

1 blátt box af sveppum
2 skeiðar af smjöri
1 lítil sítróna eða 1/2 lítil, safinn

Skera sveppina niður og steikja þá í smjörinu.  Hella svo sítrónusafanum yfir.  Geyma þetta svo þar til í lokin.  Þá er þessu bætt út í pottinn með kjúklingnum og leyft að malla í ca 5 mínútur.

Basilika
Steinselja

Í lok suðutímans er gott að setja dáldið af rifnum basilikublöðum út í ásamt smá af steinselju.  Ég notaði reyndar bara þurrkað.

Bera svo fram með góðu salati, hýðishrísgrjónum og jafnvel sætum kartöflum.

Bolludagsbollur

Bolludagurinn nálgast með tilheyrandi sætindum og rjóma.  Ég ákvað að prófa að breyta gömlu bolluuppskriftinni og sjá hvort það myndi ganga að gera hana eitthvað örlítið hollari.  Ég skipti hveitinu í raun bara út fyrir spelt og nota sykurlaust súkkulaði eða dökkt organic súkkulaði.  Svo er um að gera að nota sykurlausu sulturnar frá St. Dalfour.  Mér finnst alltaf best að nota bananarjóma í bollurnar.  Þetta er kanski engin ofurhollusta en samt nóg til að friða samviskuna aðeins.

4 dl vatn

2-3 msk kókosolía

200 g fínt spelt

4 egg

Byrja á að sjóða saman vatn og kókosolíu, bæta svo sigtuðu speltinu út í pottinn og hræra kröftuglega saman.  Hræra í smá stund yfir heitri hellu.  Þar til degið fær mjúka áferð.  Kæla degið, t.d. í ísskáp eða yfir vatnsbaði.  Þegar degið er orðið nokkuð kalt, bæta þá eggjunum saman við einu í einu og þeyta vel með handþeytara.  Hræra þarf deigið dáldið vel eftir að eggin eru komin í.  Setja bollur á plötu og baka í 30 mín við 200° C.  Þetta ættu að verða ca. 15-20 bollur.

Bananarjómi

1 peli rjómi

1 banani sem er aðeins farinn að láta á sjá

vanilluduft ca. 1/2 tsk

Þeyta rjómann, stappa bananann og blanda svo saman ásamt vanillu.

Sykurlaus sulta
Dökkt súkkulaði eða súkkulaði án viðbætts sykurs
Ávextir, ber
Jurtarjómi
Kasjúhneturjómi

Bara nota hugmyndaflugið og skella einhverju hollu og góðu inn í bollurnar.

Karrý -kókos kjúklingaréttur

Þessi réttur kom skemmtilega á óvart.  Tilvalið er að nota bara það grænmeti sem til er á heimilinu hverju sinni.   Ég nota túrmerik og karrý í þennan rétt, en nýlega hefur verið mikið fjallað um góð áhrif túrmeriks á líkamann.  Er það meðal annars talið vera mjög krabbameinshamlandi og vinna gegn bólgum í líkamanum.

4 kjúklingabringur (auðvitað ósprautaðar)
2 msk kókosolía
1 laukur smátt skorinn
grænmeti, t.d. paprika, sveppir, brokkolí, gulrætur
salt
pipar
1 tsk túrmerik
1 tsk karrý
kókosmjólk 1 dós
1 epli (sætt og lífrænt)

Byrja á að skera kjúklinginn í litla bita og brúna hann svo aðeins á pönnu í kókosolíunni.  Bæta svo lauk og grænmeti á pönnuna.  Krydda með salti, pipar, túrmerik og karrý.  Hella kókosmjólkinni út á, bæta smátt skornum eplunum út í og leyfa þessu að malla í nokkrar mínútur.
Borið fram með grænmeti, sætum kartöflum og hýðishrísgrjónum.